Na mwandishi wetu

Wizara ya elimu na mafunzo amali Zanzibar imekihakishia chama cha walimu Zanzibar (ZATU) kushirikiana kwa pamoja katika kutatua changamoto  mbali mbali zinazowakabili katika sekta ya hiyo.

Akifungua kongamano la siku ya walimu duniani katibu mkuu  wizara ya  elimu na mafunzo ya amali Zanzibar Khamis Abdalla Said kwa niaba ya waziri wa elimu na mafunzo ya amali Zanziba  Lela Mohammed Mussa amesema ni  haki ya kila mwalimu kuhakikisha anapata stahiki zake zote ambazo anastahiki .

Amesema wapo baadhi ya walimu wakuu wameshindwa kusimamia majukumu yao ipasavyo ,hivyo ni vyema kuhakikisha kila mmoja anawajibika katika majukumu yake .

Aidha amewaomba walimu ambao bado hawajajiunga na chama cha walimu Zanzibar (ZATU)kuhakikisha wanajiunga na chama hicho ili waweze kutatuliwa kero zao kwa haraka .

Akitoa salamu za wizara ya elimu Pemba afisa mdhamini wa wizara ya elimu Pemba Mohd Nassor Salim amesema Zaidi ya walimu 1446 wameajiriwa katika kisiwa cha Pemba kuanzia mwezi Januari mpaka sasa hivo ni jukumu la walimu kuhakikisha wanafanya kazi kwa weledi Zaidi.

Amesema bado matokeo ya kidato cha nne hayaridhishi kwa mikoa yote miwili Kaskazini na Kusini Pemba hivo ni jukumu la kila mmoja kwa nafasi yake kusimamia ili wanafuzi waweze kufanya vizuri.

Kwa upande wake naibu katibu mkuu Zanzibar  wa Chama Cha Mapinduzi Mohd Said Dimwa ameitaka serikali kuhakikisha inafanya mchakato haraka wa kupatikana tume ya utumishi kwa ya walimu Zanzibar kabla ya mwaka huu kumaliza.

Ameeleza kuwa lengo la rais wa Zanzibar ni kuona Pemba inafunguka kama sehemu nyengine kutokana na neema ambayo inapatikana kisiwani hapa.

Akisoma risala ya walimu kwa mgeni rasmi katibu mkuu wa ZATU Haji Juma Omar ameiomba Serikali kurejesha nauli za walimu ambao wanaishi mbali na maeneo ya kazi ili kuweza kufanya kazi kwa ufasi .

 

Chama cha walimu Zanzibar kimeadhimisha siku ya walimu duniani katika ukumbi wa chuo kikuu Zanzibar (SUZA)Wete kwa kauli mbiu isemayo ,kuwepo kwa tume ya utumishi ya walimu Zanzibar kutatatua changamoto zinazowakabili walimu wa Zanzibar.